Avropa Birliginiñ elçileri Rusiyege qarşı sanktsiyalarnıñ 18-inci paketini tasdıqladı, dep haber ete Azatlıq Radiosınıñ muarriri Rikard Yozvâk.
"Yeşil ışıq —AB elçileri Rusiyege qarşı sanktsiyalarnı tasdıqladı. Resmiy bir tasdıqlav bugün keççe olacaq", — dep yazdı o, Х içtimaiy ağında.
AB tış işler ve telükesizlik siyaseti Yuqarı temsilcisi Kaya Kallas bu sanktsiyalar paketine "eñ küçlülerinden biri" dep ayttı.
"Kremlniñ arbiy bücetini daa da qısqartamız, daa 105 kölge gemisini ve olarnıñ ortaqlarını taqip etemiz ve Rusiye banklarınıñ parağa irişimini sıñırlaymız. Şimaliy aqım boruları yasaq etilecek. Neft fiyatınıñ yuqarı sıñırı tüşürildi", — dep yazdı o, içtimaiy ağda.
Kallas, Avropa Birligi Rusiye arbiy sanayısına, sanktsiyalarnı bozmağa imkân bergen Çin banklarına basqı quvetleştirgenini ve pilorsız uçaqlarda qullanılğan tehnologiyalarnıñ ihracatını blok etkenini qoştı.
"Fiyatlarnı kötermege devam etecekmiz, şunıñ içün istilânıñ toqtatıluvı Moskva içün yekâne yolğa çevirile", — dep qoştı Kallas.
Evel Slovakiya, 2028 senesinden başlap Rusiye gazınıñ bütün italâtını toqtatmaq Avropa komissiyasınıñ ayrı teklifinen razı olmağanı sebebinden, AB sanktsiyalarınıñ 18-inci paketini blok etken edi, bu ise, Slovakiyanıñ fikrine köre, qıtlıqqa, fiyat ve tranzit tölevleriniñ artmasına, em de Rusiye "Gazprom" teminleyicisiniñ zarar tazminatı aqqında iddialarına ketire bile.
